SOCAR-ın adından istifadə edib insanları aldatmağa cəhd etdilər

Son zamanlar Dövlət Neft Şirkətinin adından istifadə olunaraq, maddi maraq qarşılığında hüquqi və fiziki şəxslərə fərdi və korporativ qaydada əməkdaşlıq, xüsusən investisiya yatırma imkanları, o cümlədən saxta istiqrazların alınması, işə düzəltmə və s. ilə bağlı müxtəlif təkliflər edilir.

SOCAR-ın açıqlamasında bildirilir ki, bu cür dələduzluq halları müxtəlif internet kanalları, sosial media platformaları, mobil tətbiqlər, elektron ünvan və ya telefon zəngləri vasitəsilə həyata keçirilir. Son həftələr bu tip saxta məlumatlarla bağlı kampaniyalarda yenidən aktivlik müşahidə olunduğunu açıqlayan SOCAR mübarizə məqsədilə müvafiq dövlət qurumları ilə birgə səmərəli fəaliyyət həyata keçirir.

Eyni zamanda SOCAR-ın sosial şəbəkə hesablarında dələduzluq hallarına qarşı təbliğat aparılır.

Ötən müddət ərzində məsələ ilə bağlı 60-dan çox vətəndaş müraciəti cavablandırılıb. Araşdırmalar və müraciətlər nəticəsində vətəndaşlara edilən zənglərin əsasən müxtəlif xarici ölkələrin mobil operatorlarına məxsus nömrələr vasitəsilə edildiyi müəyyənləşib.

Rəqəmsal İnkişaf və Nəqliyyat Nazirliyi ilə edilən əməkdaşlıq nəticəsində SOCAR adından saxta investisiya kampaniyaları ilə bağlı mobil tətbiqlərin silinməsinə nail olunub.

Dövlət Neft Şirkəti vətəndaşları heç bir əsası olmayan bu cür məlumatlara inanmamağa, belə hallara qarşı ehtiyatlı və ayıq-sayıq olmağa çağırır, yalnız rəsmi mənbələrdə yer alan informasiyalara istinad olunmasını xahiş edir.