SOCAR-ın vitse-prezidentinin müavinindən gələcək hədəflərlə bağlı açıqlama

“Növbəti 10 il ərzində qarşımıza məqsəd qoymuşuq ki, SOCAR təkcə neft-qaz şirkəti deyil, həm də milli enerji şirkətinə çevrilsin. SOCAR-ı 2050-ci ildə yerli və regional deyil, qlobal enerji təhlükəsizliyinə və iqlim davamlılığına töhfə verən enerji şirkət kimi görürük”.

Bunu Azərbaycan Dövlət Neft Şirkətinin (SOCAR) vitse-prezidentinin müavini Teymur Quliyev Milli Məclisin Təbii ehtiyatlar, energetika və ekologiya komitəsinin bu gün keçirilən iclasında “Enerji səmərəliliyi: nəticələr və gözləntilər” mövzusunda ictimai müzakirədə çıxışı zamanı deyib.

“Ortamüddətli hədəflərimiz var. Hansı ki bizi əmin edəcək ki, 2050-ci ilədək olan hədəflərimizi yoxlayaq və düzgün yolda irəliləyək. Şirkətin arşıdakı hədəfləri 2030-cu ilə məşəldə rutin yandırmanın sıfıra endirilməsi, “Upstream” emissiyaları intensivliyinin 30 faiz azaldılması, 2035-ci ilə korporativ emissiya intensivliyinin 30 faiz azaldılması, ümumi emissiyaların 20 faiz azaldılması və 2050-ci ildə “xalis sıfır”a çatmaqdır”, − deyə T.Quliyev qeyd edib.