SOCAR və “Uniper “Etilen-Polietilen” zavodunda yeni qurğunu işə salacaq

“Azərbaycan Dövlət Neft Şirkəti və Almaniyanın “Uniper” şirkətinin birgə müəssisəsi “SOCAR-Uniper” şirkəti noyabrda Bakıda keçiriləcək COP29 çərçivəsində “Azərikimya” İstehsalat Birliyinin “Etilen-Polietilen” zavodunda turbogenerator qurğusunu işə salacaq”.

Bunu “Uniper”in Azərbaycan nümayəndəliyinin rəhbəri Rəşad Hüseynli Bakıda keçirilən “Caspian Energy Forum”da deyib.

Onun sözlərinə görə, bu, “SOCAR-Uniper” tərəfindən “Azərikimya” üçün enerji səmərəliliyi sahəsində həyata keçirilən böyük layihədir.

Bildirilib ki, layihə artıq başa çatıb və COP29 konfransı çərçivəsində “Etilen-Polietilen” zavodunda elektrik enerjisi və buxar istehsalı üçün turbogenerator qurğusunun işə salınması ilə bağlı rəsmi mərasim keçiriləcək.

Rəşad Hüseynli qeyd edib ki, məqsəd zavodu elektrik enerjisi ilə təmin edən buxar-generator kompleksinin enerji effektivliyini və istehsal gücünü artırmaqdır.

“Uniper”in Azərbaycan nümayəndəliyinin rəhbəri əlavə edib ki, SOCAR və “Uniper” uzun illərdir ki, “Şahdəniz” yatağından təbii qazın tədarükü, eləcə də insan resursları, texnoloji mübadilə, emissiyaların azaldılması, enerji səmərəliliyi sahələrində uğurla əməkdaşlıq edir.

Xatırladaq ki, 2016-cı ildə SOCAR Almaniyanın “Uniper” şirkəti ilə saziş imzalayaraq “SOCAR-Uniper” birgə müəssisəsini yaradıb. "Etilen-Polietilen" zavodunda hazırkı buxar-generator kompleksinin 32 Mvt/s layihə gücünün 65 Mvt/s layihə gücünə çatdırılması işləri uğurla tamamlanır. Bunun üçün əlavə turbogenerator quraşdırılırıb və mövcud texnoloji sistem təkmilləşdirilib.