Yeni metrostansiyaların tikilməsi mənzil bazarına necə təsir edəcək? | Ekspertlər danışdı - Baku TV

Yeni metrostansiyaların tikilməsi həmin ərazilərdə mənzil və torpaq qiymətlərinə təsir edəcək.

Bunu əmlak məsələləri üzrə ekspertlər deyirlər.

Onların sözlərinə görə, Yeni Günəşli, Zabrat, Saray, Masazır və Xırdalanda inşa ediləcək yeni stansiyalar bu ərazilərdə daşınmaz əmlaka tələbatın artmasına, qiymətlərin isə 15-20% yüksəlməsinə səbəb olacaq.

“Xüsusilə orta təminatlı əhali qrupları nəqliyyat xərclərini optimallaşdırmaq, azaltmaq məqsədilə bu cür ərazilərə müraciət edəcəklər. Bu amil təbii ki, mülkiyyətçi tərəfindən psixoloji faktor olaraq dərhal qiymətləndiriləcək və həmin ərazilərdə olan qiymətlərə təsir göstərəcək”, – deyə əmlak məsələləri üzrə ekspert Ramil Osmanlı mövzu ilə bağlı açıqlamasında bildirib.

“Bakı Metropoliteni”ndə inşası planlaşdırılan 10 yeni stansiyadan birində artıq tikinti işləri aparılır. Digər 9 stansiya üzrə isə layihələndirmə prosesi yekunlaşıb.

Yerüstü Nəqliyyat Agentliyinin məlumatına görə, metronun şərti adı B4 olan stansiyada tikinti işləri hazırda davam etdirilir və bu ilin sentyabr ayınadək başa çatdırılması nəzərdə tutulur. Həmçinin Dərnəgül deposunda tikinti işlərinə start verilib.