İtaliyanın müxtəlif şəhərlərində etirazçılarla polislər arasında toqquşmalar yaşanıb - Baku TV

İtaliyanın bir sıra şəhərlərində hökumətin siyasətinə, yanacağın bahalaşmasına, inflyasiyaya və hərbi xərclərin artırılmasına qarşı etiraz aksiyaları keçirilib.

Turin, Bolonya və Florensiya kimi şəhərlərdə polislə toqquşmalar qeydə alınıb.

Romada nümayişçilər İtaliyanın münaqişələrdə iştirakına, yenidən silahlanmaya, NATO-ya və İsrailin fəaliyyətinə etiraz ediblər. Polis etirazçıları dağıtmaq üçün su şırnaqlarından və gözyaşardıcı qazdan istifadə edib.

Məlumata görə, üzərilərində təhlükəli əşyalar aşkarlanan 43 nəfər saxlanılıb.

Milanda aksiyaya təxminən 10 min nəfər qatılıb. Ciddi insidentlər baş verməyib. Turin şəhərində isə etirazçılar polisə butulkalar atıblar.

Ötən həftəsonu baş verən iğtişaşlardan sonra polis tədbirləri gücləndirib.

Məlumata görə, zorakılığa çağırışların yayıldığı 17 oktyabr hərəkatı ilə əlaqəli şəxslərdən biri saxlanılıb. Ümumilikdə ekstremist mövqelər nümayiş etdirən 200 nəfərin şəxsiyyəti müəyyənləşdirilib.

Hökumət etirazlar zamanı zorakılıq və xuliqanlığa görə cəzaları sərtləşdirib. Milan şəhərinə əlavə 500 hərbçi göndərilib.