Luvr muzeyinin Apollon qalereyası 9 aylıq fasilədən sonra açılıb

Fransanın Luvr muzeyində yerləşən məşhur Apollon qalereyası ziyarətçilər üçün iyulun 22-dən etibarən yenidən açılıb.

Fransa mediasının məlumatına görə, qalereya hələlik öz kolleksiyaları və qiymətli eksponatları olmadan fəaliyyət göstərəcək.

Bu açılış baş verən qarətdən təxminən doqquz ay sonraya təsadüf edir. Həmin hadisə zamanı Fransa taxt-tacına məxsus səkkiz qiymətli əşya oğurlanmışdı. Onların ümumi dəyərinin təqribən 102 milyon avro olduğu bildirilir.

Apollon qalereyası Luvrun ən məşhur məkanlarından biri hesab olunur. 15 metr hündürlüyündə tavanı olan bu möhtəşəm zal Fransa kralı XIV Lüdovikin göstərişi ilə inşa etdirilib.

Qeyd edək ki, ildə təxminən 9 milyon ziyarətçi qəbul edən Luvr dünyanın ən böyük muzeyi sayılır.