Nəcəf şəhərində qum fırtınasına görə xəstəxanalara müraciət edənlərin sayı artıb

İraqın Nəcəf şəhərində baş verən qum fırtınası görmə məsafəsini azaldıb.

Yaşanan vəziyyət xüsusilə yaşlılar və xroniki xəstəliklərdən əziyyət çəkən şəxslərin xəstəxanalara müraciət etməsinə səbəb olub.

Qalın qum təbəqəsinə bürünmüş küçələr fonunda xəstələr “Al-Hakeem Hospital” xəstəxanasının təcili yardım şöbəsinə axışıb.

“Havadakı toz səbəbi ilə Nəcəfdə nəfəsalma çətinliyi hallarının sayı artıb, xüsusilə astma və xroniki ağciyər xəstəliyindən əziyyət çəkən insanlar arasında. Bu xəstələr belə şəraitə tab gətirə bilmirlər”, – deyə həkim Hüssam Heydər bildirib.

O əlavə edib ki, xəstəxana hazırlıqlı vəziyyətdədir və müalicə davam etdirilir, lakin belə hava şəraiti hətta sağlam insanların vəziyyətini də pisləşdirə biləcəyi üçün xəstələr müşahidə altında saxlanılır.