Qabaqlayıcı tədbir, yoxsa müharibəyə təşviq? | İsrail kəşfiyyatından kimyəvi silah ittihamı

İsrail ABŞ-yə İranın kimyəvi silahdan istifadə etməyi planlaşdırdığı barədə kəşfiyyat məlumatları ötürüb.

Bu barədə "The New York Times" qəzeti ABŞ və region rəsmilərinə istinadən məlumat yayıb.

Məlumata görə, İsrail Vaşinqtona İranın son iki həftə ərzində raketləri kimyəvi başlıqlarla təchiz etmək üçün texnologiyanı sürətlə inkişaf etdirdiyini bildirib. Həmçinin Tehranın bu silahları İsrailə və ya başqa ölkələrə qarşı mümkün hücumlarda istifadə etmək üçün gizli şəkildə daşıya biləcəyi iddia olunub. Lakin ABŞ rəsmiləri bu məlumatlara fərqli yanaşıblar.

Bəziləri iddialardan narahat olduqlarını bildirsələr də, digərləri onların doğruluğuna şübhə ilə yanaşıblar. Hətta İsrailin bu məlumatlarla ABŞ-ni İrana qarşı genişmiqyaslı hərbi əməliyyatları bərpa etməyə inandırmağa çalışdığı ehtimalı da irəli sürülüb.

Qəzetin məlumatına görə, İsrail iddialarını təsdiqləyən konkret sübutlar təqdim etməyib. Xəbərdarlıqlar yalnız kəşfiyyat qiymətləndirmələrinə əsaslanıb. Fars körfəzi ölkələri də bu məlumatlara şübhə ilə yanaşıblar.