Türkiyə XİN husilərin Məkkəyə PUA hücumunu qətiyyətlə pislədi - Baku TV

Türkiyə Səudiyyə Ərəbistanının müqəddəs şəhəri olan Məkkəyə hücumu qətiyyətlə pisləyib.

Bu barədə Türkiyə Xarici İşlər Nazirliyinin açıqlamasında bildirilir.

Nazirlikdən qeyd edilib ki, müqəddəs Məkkə şəhərinə husilərin PUA-lar vasitəsilə hücumu qətiyyətlə pislənməlidir.

Ankara həmçinin bu cür hücumların bütün region üçün təhlükəsizlik təhdidi yaratdığını qeyd edərək, onların dərhal dayandırılmasına çağırıb.

"Regional sabitliyə və təhlükəsizliyə təhdid yaradan bu hücumlara dərhal son qoyulması və gərginliyin daha da artmasına yönəlmiş hər hansı bir hərəkətdən çəkinilməsi çağırışımızı bir daha təkrarlayırıq", – deyə Xarici İşlər Nazirliyinin açıqlamasında bildirilir.

Qeyd edək ki, husilər artıq ikinci dəfədir ki, Məkkəni hədəf alıb. Onların PUA-ları hava hücumundan müdafiə sistemləri tərəfindən aşkar edilərək məhv edilib.

Husilərin hərbi sözçüsü Yəhya Sari isə Məkkəni hədəf aldıqları iddialarının yalan olduğunu bildirib.

Bu arada, husilər Yəməndə vurulduğu iddia edilən Səudiyyə Ərəbistanına məxsus "F-15" qırıcı təyyarəsinin görüntülərini yayımlayıb. Təyyarənin ölkənin şimal-şərqindəki Marib əyaləti üzərində vurulduğu iddia edilir. Hadisə ilə bağlı başqa heç bir təfərrüat verilməyib.