Ukraynada kəskin bahalaşma davam edir | İki ildir qarderobumu yeniləmirəm...

Ukraynada gedən müharibə fonunda ölkədə artıq bir neçə aydır ki, kəskin qiymət artımı müşahidə olunur.

Bu, son 7-8 ayda 20-30 faiz bahalaşan yanacaq məhsulları ilə yanaşı, ərzaq, daşınmaz və daşınan əmlakda da kəskin müşahidə olunur.

Ukraynanın tanınmış iqtisadçısı Oleksandr Bondarenkonun fikrincə, bahalaşma daha çox enerji qiymətlərinin kəskin artması ilə əlaqəlidir:

“Elektrik enerjisi istehsal edən obyektlərin və elektrik paylama sistemlərinin kütləvi zərbələrlə vurulması Ukraynada ərzaq və malların qiymətinə ciddi təsir göstərib. Buna görə də hazırda Ukrayna Avropa İttifaqından elektrik enerjisi idxal etmək məcburiyyətindədir. Odur ki, elektrik enerjisi daha da bahalaşıb və digər sahələrdəki bahalıq da bundan qaynaqlanır.

Avropa İttifaqından idxal edilən elektrik enerjisinin 1 kilovat-saatının qiyməti təxminən 18-19 avrosentdir. Amma ölkədə elektrik enerjisinin əvvəlki qiyməti 11-12 avrosent idi. İkinci amil logistika, daşıma xərclərinin artması ilə bağlıdır. Son il yarım-2 il ərzində həm quru, həm də dəniz yolu ilə yük daşımalarının qiyməti bahalaşıb”.

Qeyd edək ki, son günlər Ukraynanın, demək olar ki, bütün vilayətləri yenidən hava hücumlarına məruz qalır. Zərbələr zamanı isə infrastruktur obyektləri tez-tez hədəf alınır.