DİN-dən Hökumə Əliyevanın ailəsinə qarşı cinayətlə bağlı açıqlama | Dələduzlar müəyyən edildi

Milli Qəhrəman Hökumə Əliyevanın atası Cəlil Alıyevə məxsus bank kartından oğurluq faktı üzrə Daxili İşlər Nazirliyinin Kibercinayətkarlıqla Mübarizə Baş İdarəsinin əməkdaşları tərəfindən tədbirlər görülüb.

Pul vəsaitini oğurlayan şəxslər müəyyən edilib və zərər ödənilib.

Bu barədə DİN-in mətbuat xidməti məlumat verib.

Bildirilib ki, fakta görə başlanmış cinayət işi çərçivəsində cinayəti törədən şübhəli şəxslər müəyyən edilib, 80 507 manat pul vəsaitinin tam həcmdə zərərçəkmişə ödənilməsi təmin edilib. Hazırda cinayət işi üzrə əməliyyat-istintaq, əməliyyat-texniki tədbirlər davam etdirilir.

Qeyd edək ki, Aktauda qəzaya uğrayan AZAL-a məxsus təyyarədə həlak olan Hökumə Əliyevanın atasının bank kartından 80 507 manat pul oğurlanmışdı. Cəlil Alıyevin sözlərinə görə, pulu oğurlayan şəxslər onu “Kapital Bank”ın əməkdaşı olduğunu deyərək aldadıb.