Azərbaycanlı karateçi Avropa çempionu oldu

Azərbaycanlı karateçi, ikinci dan qara kəmər sahibi, 84 kq çəki dərəcəsində qüvvəsini sınayan Ülvi Məmmədov Avropa çempionatında qələbə qazanıb.

Dünya və Avropa Şotokan Federasiyasının təşkilatçılığı ilə Bolqarıstanda keçirilən yarışda iştirak edən Ülvi ardıcıl olaraq Rumıniya, Gürcüstan və Çexiya nümayəndələrinə qalib gələrək finala yüksəlib. Həlledici görüşdə isə Bolqarıstan idmançısını məğlub edən Ü.Məmmədov qitə çempionu adına yiyələnib.

Qeyd edək ki, Kranevo şəhərində baş tutan turnirdə 1-ci yeri tutan Ü.Məmmədov həm də dəfələrlə Azərbaycan çempionatında qələbə qazanıb. Bundan başqa, o, ötən il Çexiyada keçirilən dünya çempionatında fəxri kürsünün ən yüksək pilləsinə qalxıb.