Çempionlar Liqası: “Borussiya Dortmund” PSJ-ni qəbul edib

UEFA Çempionlar liqasında yarımfinal mərhələsinin növbəti oyunu keçirilib. PSJ Dortmundda “Borussiya”nın qonağı olub.

“Siqnal İduna Park” arenasında keçirilən matça parislilər sürətli hücumlarla başlasa da, səyləri nəticə verməyib. 36-cı dəqiqədə isə meydan sahibləri hesabı açıblar. Niklas Fülkruqun zərbəsi dəqiq olub:1-0. İlk hissə bu hesabla yekunlaşıb.

İkinci yarıda məğlubiyyətdən qurtulmağa çalışan PSJ təzyiqi artırsa da, yenə fərqlənməyi bacarmayıb. Sərfəli nəticəni qoruyan “Borussiya” cavab oyunundan əvvəl üstünlük əldə edib.

Qeyd edək ki, bu klublar arasında yarımfinalın cavab görüşü mayın 7-də Fransada olacaq.