Futbolda qara kart nədir və hansı hallarda tətbiq olunacaq? - Baku TV

Futbolda yeni cəza mexanizmi tətbiq olunacaq.

Belə ki, qırmızı və sarı kartlarla yanaşı, qara kartdan da istifadə ediləcək. Qayda hələlik Rumıniya Futbol Federasiyasının təşkilatçılığı ilə keçirilən aşağı yaş qrupları üzrə yarışlarda tətbiq olunacaq.

Bununla bağlı Baku TV-nin idman əməkdaşı Emin Şəmsiyev məlumat verib.

“Söhbət 6 yaşından 17 yaşa qədər futbolçuların yarışlarından gedir. Bu qayda yalnız futbolçulara deyil, azarkeşlərə və futbolçuların valideynlərinə də şamil olunacaq. Məqsəd təhqiramiz ifadələrin, davaların və digər neqativ halların qarşısını almaqdır”, – deyə E.Şəmsiyev qeyd edib.

Onun sözlərinə görə, insidentlər təkrarlanarsa, hakim qara kart göstərərək oyunun dayandırılması və məsələnin araşdırılması barədə qərar verə bilər.

E.Şəmsiyev qeyd edib ki, bu qayda hələlik yalnız Rumıniyada keçirilən aşağı yaş qrupları üzrə yarışlara aiddir və FIFA və ya UEFA bayrağı altında keçirilən turnirlərdə tətbiq olunmur:

“Böyük futbolda belə bir qərarın tətbiq olunub-olunmayacağı məlum deyil. Hazırda rəsmi oyunlarda əsasən sarı və qırmızı vərəqələrdən istifadə olunur”.

Ekspert bildirib ki, qara kartın tətbiqində əsas məqsədlərdən biri valideynlər və azarkeşlər arasında baş verən insidentlərin qarşısını almaqdır.