"Qalatasaray"ın Paulo Dibala planı məlum oldu

Heyətində Mauro İkardi, Viktor Osimhen və digər ulduz futbolçular olan “Qalatasaray” daha bir məşhur oyunçu ilə güclənəcək.

“Sarı-qırmızılar” “Roma”nın üzvü Paulo Dibala ilə yaxından maraqlanır. İddialara görə, İstanbul təmsilçisi artıq 30 yaşlı Paulonun keçidi üçün danışıqlara başlayıb.

Müqaviləsi mövsümün sonunadək olan Dibala İtaliyada qalmaq istəmədiyi üçün onun “cimbom”a qoşulmaq ehtimalı yüksəkdir.

Qeyd edək ki, Argentinanın “İnstituto” kollektivinin yetirməsi olan Dibala daha əvvəl İtaliyanın “Palermo” və “Yuventus” kollektivlərində top qovub. Turin təmsilçisinin heyətində 293 matçda 115 qol vuran futbolçu 5 dəfə A Seriyasını qazanmaqla yanaşı, dəfələrlə ölkə kuboku və superkubokuna yiyələnib.

2022-ci ilin yayından “Roma”da çıxış edən Paulo “canavarlar”ın forması ilə 84 matçda 35 qol və 18 məhsuldar ötürmə müəllifi olub. 2022-ci ildə Argentina millisi ilə dünya çempionu olan Dibala yığmada 40 görüşdə 4 qolla yadda qalıb.