ADA Universitetində 19-cu Bakı Yay Enerji Məktəbi işə başlayıb | Açılış mərasimindən görüntülər

Azərbaycan təkcə neft, qaz və enerji resurslarının təchizatçısı deyil, həm də bilik və təcrübənin ixracatçısıdır.

Bunu Azərbaycan Dövlət Neft Şirkətinin (SOCAR) vitse-prezidenti Ziba Mustafayeva ADA Universitetində keçirilən 19-cu Bakı Yay Enerji Məktəbinin (“Baku Summer Energy School” – BSES 2025) açılış mərasimində bildirib.

Onun sözlərinə görə, Yay Enerji Məktəbi SOCAR və ADA-nın əməkdaşlığı çərçivəsində ən uğurlu təşəbbüslərdən biridir.

SOCAR-ın vitse-prezidenti həmçinin qeyd edib ki, hər il məktəbdə Avropa, Asiya və Afrikadan nümayəndələr iştirak edirlər:

“Müxtəlif regionlardan olan nümayəndələrin iştirakı Azərbaycanın enerji təhlükəsizliyi və resursların davamlı istifadəsi üzrə qlobal dialoqda mühüm mərkəz kimi artan rolunu vurğulayır”.