ABŞ və Azərbaycan əlaqələri strateji tərəfdaşlıq formatına keçir

“Bu, mənim Prezident Trampla birinci görüşümdür. Görüş çox səmimi şəkildə keçdi”.

Bunu Azərbaycan Prezidenti İlham Əliyev Vaşinqtonda Azərbaycan mətbuatına müsahibəsində deyib.

Dövlət başçısı qeyd edib ki, Tramp Azərbaycan haqqında çox məlumatlıdır: “Sözün düzü, onun Azərbaycanla bağlı bildikləri məni təəccübləndirdi. O, bir çox məsələləri dərindən bilir. Cənab Tramp Azərbaycanın önəmini, onun geosiyasi əhəmiyyətini, Azərbaycanın ABŞ-yə həmişə dost ölkə olmasını çox yaxşı bilir. Əlbəttə ki, bizim münasibətlərimizdə şəxsi təmaslar önəmli rol oynayacaq”.

Prezident həmçinin 907-ci düzəlişin ləğvinin tarixi hadisə olduğunu bildirib: “Hesab edirəm ki, artıq strateji əməkdaşlıq formatına başlamağımız da tarixi hadisədir. Mən səfərin nəticələrindən çox məmnunam. Əminəm ki, səfərin konkret nəticələri yaxın gələcəkdə özünü büruzə verəcək”.