Atam danışırdı ki, evimizi tərk edəndə qapıdakı itimiz ağladı | QƏRBİ AZƏRBAYCAN XRONİKASI

“Qərbi Azərbaycan Xronikası” layihəsi çərçivəsində "Həyat Hekayəsi" verilişinin növbəti buraxılışı hazırlanıb.

“Azərbaycanlılar erməninin kəsdiyi malın ətini almırdılar” adlı veriliş Gərnibasar mahalının Qəmərli rayonunun Yamancalı kənd sakini Elara Şükürovanın həyat hekayəsinə həsr olunub.

O, uşaqlıq xatirələri, təhsil və iş həyatında qarşılaşdığı ayrı-seçkilik, üzləşdiyi çətinliklər, 1950, 1965 və 1988-ci illərdə baş verən hadisələr haqqında danışıb, yaşadığı ümumi həyatı bölüşüb.

Onun sözlərinə görə, 1965-ci ildə “erməni soyqırımı”nın 50 illiyi ilə əlaqədar kənddə böyük gərginlik yaşanıb:

“Polis kəndə gəldi, sakinlərə evdən çıxmamaq tapşırıldı. Bu hadisədən sonra azərbaycanlılara qarşı münasibət dəyişməyə başlayıb”.

E.Şükürova 1968-ci ildə İrəvan şəhərinə köçüb, əvvəlcə Tibb Texnikumunu, sonra isə İrəvan Dövlət Universitetinin biologiya fakültəsini bitirib:

“Təhsil aldığım müddətdə və iş həyatımda azərbaycanlı olduğum üçün müəyyən çətinliklərlə üzləşirdim. 1988-ci ildə Sumqayıt hadisələrindən sonra vəziyyət kəskin şəkildə pisləşdi. Ailəmiz və digər azərbaycanlılar təzyiqlərə məruz qalır, evləri yandırılırdı. Nəticədə biz doğma yurdumuzu tərk etməyə məcbur qaldıq. 1988-ci ildə ailəmiz ilə birlikdə doğma yurdumuzdan deportasiya olunub qovulduq. Atam danışırdı ki, evimizi tərk edəndə qapıdakı itimiz ağladı”.