Avropa İttifaqından Azərbaycana qarşı əsassız ittihamların iç üzü

Yanvarın 22-də Xarici Əlaqələr Şurasının yekunlarına dair mətbuat konfransı zamanı Avropa İttifaqının xarici əlaqələr və təhlükəsizlik siyasəti üzrə ali nümayəndəsi Cozep Borrel Azərbaycana qarşı yenidən əsassız iddialar səsləndirib.

Belə ki o, Fransa ilə həmrəy olduqlarını bəyan edərək Azərbaycanın Ermənistana qarşı ərazi iddiası olmasına və bunun rəsmi Bakı üçün mənfi nəticələnəcəyinə dair təhdid ritorikası ilə çıxış edib.

Enerji tərəfdaşlığı sahəsində əldə edilən razılığa görə, Azərbaycanın Aİ-nin təbii qaz təchizatında payı 4 faizə çatıb. Həmçinin Azərbaycan təhlükəsizlik məsələlərinin həllində Aİ ilə birgə beynəlxalq nəqliyyat dəhlizlərinin genişləndirilməsi sahəsində də aktiv iştirak edir. Bütün bunların fonunda Borrelin Azərbaycanın legitim maraqlarını görməzdən gəlməsi və ölkəmizə qarşı təcavüzkar siyasəti qızışdıran bəyanatı nədən xəbər verir?

Millət vəkili Bəhruz Məhərrəmov bildirib ki, Cozep Borrelin Azərbaycan əleyhinə səsləndirdiyi bəyanatlar beynəlxalq hüququn normalarında əksini tapan prinsiplərə zidd olmaqla yanaşı, həm də regionda sülhü, sabitliyi təhdid edən ikili standart nümunəsi idi:

“Cozep Borrel bu çıxışında sanki Aİ-nin rəsmisi kimi yox, ASALA-nın funksioneri kimi, yaxud “Daşnaksütyun” partiyasının nümayəndəsi kimi danışıb. Cozep Borrel başa düşmür ki, nə onun, nə də təmsil etdiyi təsisatın digər bölgələrdə, o cümlədən Cənubi Qafqazda borometr funksiyası yerinə yetirmək, yaxud jandarm kimi davranmaq səlahiyyəti yoxdur”.