Azərbaycan Ordusunun yeni strategiyası: Vətən müharibəsindən sonrakı məqsəd | HƏRBİ XRONİKA

“Hərbi xronika” rubrikasının budəfəki buraxılışında müasir hərbi strategiyanın əsas anlayışlarından olan “çəkindiricilik” konsepsiyası və bu yanaşmanın Azərbaycan Ordusunun inkişafında oynadığı rol diqqətə çatdırılıb.

Bildirilib ki, döyüş başlamadan düşməni hücumdan çəkindirmək hərbi nəzəriyyədə ən böyük uğur hesab olunur və bu, siyasi, iqtisadi və hərbi gücün vəhdəti ilə formalaşır.

Qeyd olunub ki, Vətən müharibəsindən sonrakı dövrdə, xüsusilə 2025-ci il ərzində həyata keçirilən ordu quruculuğu tədbirləri məhz bu strateji məqsədə xidmət edir. Dövlət rəhbərliyinin ardıcıl siyasəti nəticəsində əldə olunan beynəlxalq mövqelər güclü, müasir və təminatlı ordu ilə tamamlanır.

Rubrikada müdafiə sahəsində aparılan struktur islahatları, yeni qoşun növlərinin yaradılması, ordunun maddi-texniki bazasının möhkəmləndirilməsi və müasir silahlarla təchizatı önə çəkilib.

Vurğulanıb ki, müasir şəraitdə güclü ordu həm də beynəlxalq əməkdaşlıqlar, təlimlər və təcrübə mübadilələri hesabına formalaşır.

Bildirilib ki, 2025-ci ildə Azərbaycan Ordusunun beynəlxalq hərbi fəaliyyəti xüsusilə intensiv olub. Qardaş Türkiyə ilə strateji müttəfiqlik çərçivəsində keçirilən birgə təlimlər, eləcə də Türk Dövlətləri Təşkilatına üzv ölkələrlə əməkdaşlıq ordunun döyüş qabiliyyətinin və operativ uyğunluğunun artırılmasına xidmət edib.

Sonda qeyd olunub ki, bu tədbirlər Azərbaycan Ordusunun daimi inkişafını təmin etməklə yanaşı, onun etibarlı çəkindirici güc kimi mövqeyini möhkəmləndirir və ölkənin təhlükəsizliyinin etibarlı təminatına çevrilir.