Azərbaycan, Türkiyə, Özbəkistan arasındakı üçtərəfli görüşdə nələr müzakirə edildi?

Ankarada Türkiyə, Azərbaycan və Özbəkistan arasında II üçtərəfli görüş keçirilib.

İclasda üç ölkənin xarici işlər nazirləri ilə yanaşı, iqtisadiyyat və nəqliyyat nazirləri də iştirak ediblər.

İclasın gündəliyinə xarici siyasət məsələləri və regional əməkdaşlıq, ticarət, iqtisadiyyat və investisiya sahələrində əməkdaşlığın artırılması, regional nəqliyyat şəbəkələrinin inkişafı, nəqliyyat və kommunikasiya sektorlarında əməkdaşlığın gücləndirilməsi müzakirə edilib.

Görüş zamanı Orta Dəhlizin önəminin artırılmasına diqqət çəkilib, Suriya və Qəzzada baş verənlər, həmçinin Rusiya-Ukrayna müharibəsi müzakirə edilib.

Görüş çərçivəsində Azərbaycan və Özbəkistanın xarici işlər nazirləri Ceyhun Bayramov və Baxtiyor Saidov iki ölkə arasında siyasi, iqtisadi, ticarət, enerji, nəqliyyat və rabitə aspektlərini, eləcə də qarşılıqlı maraq doğuran regional və beynəlxalq təhlükəsizlik məsələlərini müzakirə ediblər.

Regional və beynəlxalq əməkdaşlıq çərçivələri, o cümlədən Türk Dövlətləri Təşkilatı, BMT, Qoşulmama Hərəkatı, İqtisadi Əməkdaşlıq Təşkilatı, Asiyada Qarşılıqlı Fəaliyyət və Etimad Tədbirləri üzrə Müşavirə, eləcə də müxtəlif çoxtərəfli formatlar çərçivəsində əməkdaşlığın perspektivləri də gündəlikdə mühüm yer tutub.

C.Bayramov həmkarını regionda sülh səyləri, mövcud çağırışlar və davamlı sülh quruculuğu prosesinə olan təhdidlər barədə məlumatlandırıb. Nazirlər həmçinin “Azərbaycan Respublikası ilə Özbəkistan Respublikası arasında diplomatik münasibətlərin qurulmasının 30 illiyinin qeyd edilməsi üzrə Tədbirlərin Kompleks Proqramı”nı imzalayıb və təsdiq ediblər.