Azərbaycan-Türkiyə Pediatrik Revmatologiya Konfransı keçirildi - Baku TV

II Azərbaycan Pediatrik Revmatologiya Simpoziumu və I Azərbaycan–Türkiyə Pediatrik Revmatologiya Konfransı keçirilib.

Tədbirdə dövlət qurumlarının nümayəndələri, Milli Məclisin deputatları, ictimai xadimlər, eləcə də Türkiyənin aparıcı pediatrik revmatoloqları iştirak ediblər.

Konfransın əsas məqsədi pediatrik revmatoloji xəstəliklərin erkən mərhələdə aşkarlanmasının əhəmiyyətini vurğulamaq, bu sahədə müasir diaqnostika və müalicə yanaşmalarını müzakirə etmək, eləcə də Azərbaycan və Türkiyə mütəxəssisləri arasında elmi əməkdaşlığı daha da gücləndirməkdir.

İki gün davam edəcək tədbir çərçivəsində 7 panel simpoziumu təşkil olunacaq. Panellərdə Azərbaycan və Türkiyədən dəvət olunan 16 məruzəçi pediatrik revmatologiyanın müxtəlif istiqamətləri üzrə çıxış edəcək, 21 mütəxəssis isə panel sədri qismində müzakirələrə rəhbərlik edəcək.

Konfrans pediatrik revmatologiya sahəsində regional əməkdaşlığın genişlənməsi və elmi bilik mübadiləsinin gücləndirilməsi baxımından mühüm platforma kimi qiymətləndirilir.