Azərbaycan və Somalinin bu sahələrdə baxışları üst-üstə düşür | Somali Prezidenti

“Bugünkü görüşümüz çox məhsuldar keçib və bu, Somali-Azərbaycan münasibətlərində yeni eranın başlanğıcı deməkdir”.

Bunu Somali Prezidenti Hasan Şeyx Mahmud fevralın 12-də Azərbaycan Prezidenti İlham Əliyevlə görüşündən sonra mətbuata bəyanatında deyib.

“Bu səfər sadəcə diplomatik əməkdaşlıq deyil. Bu, həqiqətən, iki qardaş ölkələrimiz arasında tərəfdaşlıq üzrə səmərəli və strateji müttəfiqliyin başlanğıcı deməkdir. Somali və Azərbaycanın inkişaf, təhlükəsizlik və tərəqqi ilə bağlı baxışları üst-üstə düşür. Bu gün biz əsasən tərəflər arasında daha sıx əməkdaşlığın dərinləşdirilməsinə sadiqliyimizi bildirdik. Mən həmçinin Azərbaycan xalqını öz suverenliyini və ərazi bütövlüyünü qoruduğuna görə təqdir etmək istərdim.

Son üç onillikdə bir çox oxşarlıqlarımız mövcuddur. Xüsusilə 1990-cı illərdə Azərbaycan müəyyən çətinliklərlə üzləşəndə Somali də belə çətinliklərlə üzləşib. Xoşbəxtlikdən Azərbaycan xalqı dünyanın bu hissəsində sabit və firavan bir ölkə kimi qalib gəlməyə müvəffəq olub”, – deyə Somali Prezidenti bildirib.