Azərbaycanın bərpaolunan enerji sahəsindəki imkanları barədə fikir mübadiləsi aparılıb

Azərbaycan Prezidenti İlham Əliyev Nyu-Yorkda BMT Baş Assambleyasının 80-ci sessiyası çərçivəsində dünyanın ən iri alternativ investisiya şirkətlərindən biri olan "Brookfield Asset Management"in baş icraçı direktoru Brüs Flətt ilə görüşüb. Baku TV-nin süjetində qeyd olunur ki, görüşdə Azərbaycanın bərpaolunan enerji sahəsindəki geniş imkanları və ölkəmizin regional enerji mərkəzinə (habına) çevrilməsi perspektivləri əsas müzakirə mövzusu olub. Brüs Flətt Azərbaycanın iqtisadi nailiyyətlərini və Ermənistanla münasibətlərin normallaşması istiqamətində əldə olunan sülh irəliləyişlərini yüksək qiymətləndirib. Dövlət başçısı isə Azərbaycanın yaşıl enerji keçidi strategiyasının qlobal investorlar üçün cəlbedici olduğunu və bu sahədə uzunmüddətli strateji tərəfdaşlıq üçün hər bir şəraitin yaradıldığını vurğulayıb.