Azərbaycanla Fələstin və İordaniya arasında əlaqələrin inkişafı müzakirə olunub

Milli Məclisin sədri Sahibə Qafarova iki mühüm diplomatik görüş keçirib. Əvvəlcə spiker Fələstin Dövlətinin ölkəmizdə yeni fəaliyyətə başlayan fövqəladə və səlahiyyətli səfiri Əhməd Metani ilə görüşüb.

Sahibə Qafarova səfiri təbrik edərək ona uğurlar arzulayıb.

Söhbətdə xalqlarımız arasında dostluq və qardaşlıq münasibətlərinin möhkəm təməllərə söykəndiyi vurğulanıb. İki ölkənin beynəlxalq çərçivədə bir-birinə verdiyi dəstəyin önəmi diqqətə çatdırılıb.

Səfir Əhməd Metani xüsusilə Azərbaycan Prezidentinin Fələstin xalqına göstərdiyi dəstəyə görə minnətdarlığını ifadə edib və İlham Əliyevlə görüşündən aldığı müsbət təəssüratları bölüşüb.

Sahibə Qafarova həmçinin İordaniyanın Azərbaycandakı səfiri Ömər Bərəkət əl-Naharla da görüşüb.

Spiker bildirib ki, diplomatik münasibətlərin qurulmasından ötən 32 ildə Azərbaycan-İordaniya əlaqələri yüksək səviyyəyə çatıb və əməkdaşlığın daha da genişlənməsi üçün yaxşı imkanlar var.

Görüşdə parlamentlərarası münasibətlərin inkişafı, qarşılıqlı səfərlərin və dostluq qruplarının rolu vurğulanıb.

Sahibə Qafarova İordaniya parlamentinin Qoşulmama Hərəkatı Parlament Şəbəkəsində fəal iştirakından məmnunluğunu ifadə edib, Azərbaycanla Ermənistan arasında sülh prosesinin gedişi barədə məlumat verib.