Azərbaycanlıların Ümrə ziyarətini asanlaşdırmaq üçün yeni e-viza xidməti

Azərbaycanlıların Ümrə ziyarətini asanlaşdırmaq üçün elektron viza xidməti istifadəyə verilib.

Bu barədə məlumatı Bakıda səfərdə olan Səudiyyə Ərəbistanı Krallığının Həcc və Ümrə naziri Taufiq bin Fauzən Əl Rabiə verib.

“Məqsədimiz “Səudiyyə: 2030-cu ilə Baxış” hədəflərinə uyğun olaraq rəqəmsal xidmətləri inkişaf etdirmək və müstəsna təcrübənin tətbiqi ilə yaradılan təşəbbüs və imkanlar haqqında Azərbaycandakı qardaşlarımıza məlumat verməkdir. Sizi əmin edirəm ki, Krallığın Hökuməti və onun bütün dövlət və özəl sektorları iki Müqəddəs Məscidi ziyarət etmək üçün dünyanın hər yerindən daha çox müsəlmanın gəlməsini asanlaşdırmaq məqsədi daşıyan prosedurlar və qanunlar hazırlamağa səy göstərir, onların Ümrə ziyarəti və iman səyahətlərini sadələşdirməyə, mədəni təcrübələrini zənginləşdirməyə çalışır”, – deyə Səudiyyə Ərəbistanı Krallığının Həcc və Ümrə naziri bildirib.

Taufiq bin Fauzən Əl Rabiənin sözlərinə görə, Azərbaycan vətəndaşlarının ziyarətini asanlaşdırmaq məqsədilə "VisitSaudi" portalı vasitəsilə və ya ölkəyə gəldikdən sonra hava limanlarında əldə edə biləcəkləri birillik çoxdəfəlik e-viza istifadəyə verilib ki, onunla qalma müddəti 90 günə qədərdir. Bu da onlara Ümrə ziyarətini yerinə yetirmək və Krallığın qalan bölgələrinə səyahət etmək imkanı verir.

Həmçinin müvafiq tətbiq Ümrə icazəsi və ər-Raudə əş-Şərifə ziyarət icazəsini asanlıqla və rahatlıqla əldə etməyə şərait yaradır.