Bakıda dünya prokurorlarının toplantısı | Konfrans ölkəyə nə qazandıracaq?

“Beynəlxalq Prokurorlar Assosiasiyasının 29-cu illik Konfransının Bakıda keçirilməsi ölkəmiz üçün əlamətdar hadisədir”.

Bu sözləri Baş prokuror Kamran Əliyev jurnalistlərə açıqlamasında deyib.

Baş prokurorun sözlərinə görə, bu konfransın gələcəkdə böyük əhəmiyyəti olacaq və hüquq elminə ciddi təkan verəcək:

“Biz üç il idi, bu tədbirə hazırlaşırdıq. Təbii ki, belə bir tədbirin keçirilməsi Prezidentin ciddi siyasi dəstəyi ilə real oldu. Bu, ölkəmizin prokurorluq işçiləri, hakimləri, vəkilləri və ümumilikdə hüquq ictimaiyyəti üçün mühüm konfransdır.

Burada yüzə yaxın ölkənin prokuroluqlarının nümayəndələri, həmçinin digər xarici nümayəndələr iştirak edir. Bunların içində isə 50-dən artıq ölkə Baş prokuror səviyyəsində təmsil olunur. Bu qurumun tarixində ən yüksək göstəricidir ki, bu sayda iştirakçı gəlib. Bu həm də ona görə gözəl platformadır ki, burada mən öz həmkarlarımla görüşlər keçirdim. İkitərəfli memorondumlar imzalayırıq, bəzilərinin imzalanması barədə razılığa gəlmişik. Yalnız biz yox, digər ölkələrin prokurorları da öz aralarında müzakirələr aparır. Bu günə kimi yüzə yaxın belə görüş keçirilib”.