Bakıda mühüm tədbir | II Azərbaycan–Özbəkistan Media Forumunda nələr müzakirə edilir?

“Ortaq tarixi və mədəni dəyərlərə söykənən əlaqələr dezinformasiyaya qarşı birgə mübarizə və regional informasiya təhlükəsizliyinin gücləndirilməsi baxımından mühüm əhəmiyyət daşıyır”.

Bu fikri Özbəkistan Prezident Administrasiyasının Kommunikasiya şöbəsinin sektor müdiri Dilşod Saidjanov II Azərbaycan–Özbəkistan Media Forumunda səsləndirib.

“Rəqəmsal Transformasiya və Media” mövzusunda keçirilən forumda Özbəkistan rəsmisi iki qardaş ölkə arasında media sahəsində əməkdaşlığın genişləndirilməsinin önəmini izah edib.

Medianın İnkişafı Agentliyinin İcraçı direktorunun müavini Natiq Məmmədli bildirib ki, bu tədbir Azərbaycanla Özbəkistan arasında keçirilən ikinci Media Forumudur:

“Birinci forum Özbəkistanda baş tutmuşdu. Orada əsas mövzu dezinformasiyaya qarşı mübarizədə hər iki ölkə mediasının səylərinin birləşdirilməsi idi. Bu gün isə rəqəmsal transformasiya və media məsələsi müzakirə ediləcək. Tədbir hər iki ölkədən ekspertlər və beynəlxalq səviyyəli jurnalistlərin iştirak etdiyi iki panel sessiyadan ibarət olacaq”.

Tədbirdə Audiovizual Şuranın sədri İsmət Səttarov da çıxış edib. O, Özbəkistanla birgə layihələr, informasiya mübadiləsi, yeni texnoloji trendlərin tətbiqi və peşəkar jurnalistlərimizin təcrübə mübadiləsinin qarşılıqlı inkişafımıza xidmət edəcəyini vurğulayıb.

Tədbir panel müzakirələrlə davam edib.