Bakıda Rumıniyanın Milli Gününə həsr olunmuş möhtəşəm tədbir

“Rumıniya Azərbaycanın Cənubi Qafqazda sülh, sabitlik, təhlükəsizlik və rifah mühitinin yaradılmasına yönəlmiş səylərini dəstəkləyir”.

Bunu Rumıniyanın Azərbaycandakı səfiri Vasile Soare ölkəsinin Milli Günü münasibətilə keçirilən rəsmi qəbulda deyib.

Onun sözlərinə görə, Rumıniya – Azərbaycan əməkdaşlığı 34 il ərzində siyasi, diplomatik, iqtisadi, enerji, nəqliyyat və əlaqəlilik, mədəniyyət, təhsil sahələrində, həmçinin iki cəmiyyət və xalq arasında olduqca əhəmiyyətli dərəcədə inkişaf edib.

Diplomat Rumıniya – Azərbaycan əlaqələrindən söz açaraq rəsmi Buxarestin 2009-cu ildə Bakı ilə strateji tərəfdaşlıq sazişi imzalayan ilk Avropa İttifaqı ölkəsi olduğunu diqqətə çatdırıb.

Səfir bildirib ki, Azərbaycanla Rumıniya arasında ticarət dövriyyəsi 700 milyon ABŞ dolları təşkil edir.

O, sonda vurğulayıb ki, bu gün Azərbaycan həm daxildə, həm də beynəlxalq arenada böyük potensiala və iddialı məqsədlərə malik bir dövlət kimi özünü göstərir.

Qeyd edək ki, Rumıniyanın Milli Günü və Rumıniyanın Böyük Birliyinin 107 illiyi ilə əlaqədar rəsmi qəbul keçirilib. Tədbirdə Azərbaycanda akkreditə olunmuş diplomatik korpusun nümayəndələri, hərbi attaşelər, Milli Məclisin üzvləri və ictima-siyasi xadimlər iştirak ediblər.