”Bu, beynəlxalq praktikada nadir olan hadisədir” | Bakı ədaləti necə bərpa etdi? - Baku TV

Millət vəkili Rizvan Nəbiyev Baku TV-yə açıqlamasında Bakıda keçirilən Ümumdünya Mədəniyyətlərarası Dialoq Forumunun beynəlxalq əhəmiyyətindən danışıb.

O bildirib ki, forum yalnız mədəniyyət məsələlərinin müzakirəsi üçün deyil, həm də qlobal problemlərin həlli yollarının axtarılması baxımından mühüm platformadır.

“Azərbaycan mədəniyyət diplomatiyası vasitəsilə qlobal gündəlikdə olan məsələləri müzakirəyə çıxarır, çağırışları gündəmə gətirir və onların həlli yollarını axtarır”, – deyə millət vəkili qeyd edib.

Rizvan Nəbiyev vurğulayıb ki, Azərbaycanın əsrlər boyu formalaşmış multikulturalizm və dini tolerantlıq təcrübəsi beynəlxalq əməkdaşlığa mühüm töhfə verir.

Deputat həmçinin Azərbaycanın sülh təcrübəsinə diqqət çəkib. Onun sözlərinə görə, ölkə ərazi bütövlüyünü və suverenliyini bərpa etdikdən sonra Ermənistanla sülh təşəbbüsü ilə çıxış edib.

“Beynəlxalq praktikada qalib dövlətin məğlub dövlətlə birgəyaşayışı təmin etmək üçün sülh müqaviləsi təşəbbüsü ilə çıxış etməsi nadir hallarda rast gəlinən hadisədir”, – deyə R.Nəbiyev bildirib.

Millət vəkili Vaşinqton sammitinin əhəmiyyətini vurğulayaraq sülh müqaviləsinin paraflanmasını mühüm dönüş nöqtəsi adlandırıb. O qeyd edib ki, növbəti mərhələdə müqavilənin imzalanması, ratifikasiyası və icrasına başlanması gözlənilir.

“Dünyada sülh yaratmağın Azərbaycan modeli öyrənilən və təqdir olunan modeldir. Azərbaycana marağın əsas səbəblərindən biri də budur”, – deyə Rizvan Nəbiyev əlavə edib.