Bu halda Ermənistan artıq Azərbaycanla həmrəydir | Erməni politoloq

Ermənistanın Xarici İşlər Nazirliyi öz rəsmi saytında müəyyən dəyişikliklər edib.

Bu barədə erməni politoloq Sergey Melkonyan sosial şəbəkə hesabında məlumat verib.

Bildirilib ki, portalda yer alan “Dağlıq Qarabağ problemi” bölməsindəki bütün məlumatlar silinib.

Onun sözlərinə görə, nazirliyin saytında sözügedən səhifə bu günə qədər mövcud idi və erməni, rus, ingilis və fransız dillərində fəaliyyət göstərirdi. İndi isə bu bölmə bütün dil versiyalarından yığışdırılıb.

“Əgər bu texniki səhv deyilsə, onda belə çıxır ki, Ermənistan artıq texniki və rəsmi olaraq Azərbaycanla həmrəydir. Dağlıq Qarabağ problemi artıq mövcud deyil”, – deyə o paylaşımında yazıb.