Büdcədən orduya böyük yatırım | Müdafiə sənayesinin gücləndirilməsi üçün atılan addımlar

Azərbaycan hökuməti Prezident İlham Əliyevin tapşırığı və birbaşa nəzarəti altında ordu quruculuğu sahəsində, xüsusən də müdafiə sənayesinin daha da təkmilləşdirilməsi üçün mühüm layihələr həyata keçirir.

44 günlük Vətən müharibəsindən sonra isə müdafiə xərcələrində ciddi artımlar qeydə alınıb. 5 il ərzində büdcə xərclərində bu sahənin payı 5 %-dən 17‑20 %-ə yüksəlib.

2025-ci ildə dövlət büdcəsindən müdafiə və təhlükəsizlik sahəsinə 8,5 milyard manat, təxminən 5 milyard ABŞ dolları ayrılıb. Bu, ümumi büdcə xərclərinin 20 %-ni təşkil edir. Büdcədən Silahlı Qüvvələrə 2,7 milyard manat, milli təhlükəsizlik orqanlarına 468 milyon manat, Dövlət Sərhəd Xidmətinə 540 milyon manat, digər təhlükəsizlik və müdafiə sahələrinə 4,8 milyard manat ayrılan vəsait ordunun modernləşdirilməsi və silah arsenalının mükəmməlləşdirilməsinə cəlb olunub. Bu vəsait 2024-cü ildəkindən təxminən 3, 2023-cü ildəkindən isə 8 faiz çoxdur.

Yerli istehsal silahlar arasında “İstiqlal” və “Yalquzaq” snayper tüfənglərini, “Tufan” zirehli nəqliyyat vasitəsini, “İti qovan” pilotsuz uçuş aparatını xüsusi fərqləndirə bilərik. Xaricdən alınan silahlardan isə Türkiyə istehsalı “Bayraktar TB2” və “Akıncı” zərbə PUA-ları, “Hisar” zenit-raket sistemi, İsrail istehsalı “Harop” kamikadze PUA-sı, “LORA” ballistik raketləri, Rusiya istehsalı “Smerç” reaktiv yaylım atəş sistemləri düşmənə göz dağıdır.

Sözügedən silahlar və texnikanın arsenalımıza daxil edilməsi nəticəsində Azərbaycan Ordusu regionda müasir texnologiyalara əsaslanan və yüksək döyüş qabiliyyətinə malik hərbi qüvvəyə çevrilib. Bu həm də ölkənin strateji maraqlarının qorunmasına, regionda sülhün və sabitliyin təmin olunmasına xidmət edir.