Bunu edənləri 10 il həbs gözləyir | DTX-nin yeni səlahiyyəti
Azərbaycan Prezidenti tərəfindən 30 dekabr 2023-cü ildə imzalanan və 19 yanvar 2024-cü ildə qüvvəyə minən qanunla Cinayət Məcəlləsinə 281-1 və 284-2-ci maddələr əlavə edilib.
281-1-ci maddəsinə əsasən, Azərbaycanın ərazi bütövlüyünün parçalanmasına yönələn atributların və ya simvolların nümayiş etdirilməsi, yayılması və bu məqsədlə hazırlanması, əldə edilməsi, saxlanılması, daşınması və ya gəzdirilməsinə görə cinayət məsuliyyəti müəyyən edilib. Bu əməlləri törədənlər 5 ilədək azadlıqdan məhrum ediləcək. Həmin əməllərin xarici təşkilatlar və onların nümayəndələrinin tapşırığı ilə törədilməsinə görə isə 7 ildən 12 ilədək müddətə azadlıqdan məhrumetmə cəzası nəzərdə tutulur.
284-2-ci maddəsi müharibə vaxtı və ya döyüş şəraitində Silahlı Qüvvələrin şəxsi heyətinin, hərbi silah, sursat və ya hərbi texnikasının hərəkəti, yaxud dislokasiyası haqqında məlumatların yayılmasına görə cinayət məsuliyyəti yaradır. Bu əməlləri törədənlər 3 ildən 6 ilədək azadlıqdan məhrumetmə cəzası, ağır nəticələrə səbəb olduqda isə 5 ildən 8 ilədək azadlıqdan məhrumetmə cəzası ilə üzləşəcək.
Qeyd olunan cinayətlərin ibtidai istintaqının aparılması Dövlət Təhlükəsizliyi Xidmətinə həvalə olunub.
![icon](/images/loading.png)