Ceyhun Bayramov portuqaliyalı həmkarı ilə iqtisadi əməkdaşlığa dair fikir mübadiləsi aparılıb

Noyabrın 30-da Azərbaycan xarici işlər naziri Ceyhun Bayramov Şimali Makedoniyaya işgüzar səfəri çərçivəsində Portuqaliyanın xarici işlər naziri Joao Qomis Kravinyo ilə görüşüb. Bu barədə Xarici İşlər Nazirliyindən məlumat verilib.

Azərbaycan-Portuqaliya iqtisadi əməkdaşlığının yeni sahəsi kimi enerji keçidi və bərpa olunan enerji sahələri, nəqliyyat-kommunikasiya, turizm və s. istiqamətlər üzrə fikir mübadiləsi aparılıb. Nazir Ceyhun Bayramov Portuqaliya şirkətlərini Azərbaycanda bərpa olunan enerji layihələrində iştirak etməyə dəvət edib.

Ceyhun Bayramov görüşdə həmkarını postmünaqişə dövründə Ermənistanın hərbi-siyasi təxribatları, o cümlədən Azərbaycanın Qarabağ bölgəsində qeyri-qanuni erməni silahlı qüvvələrinin törətdiyi təhdidlər, Azərbaycanın həyata keçirdiyi antiterror tədbirlərini şərtləndirən səbəblər, tədbirlərdən sonra bölgədəki cari vəziyyət barədə ətraflı məlumatlandırıb.

Azərbaycanın tam suverenliyinin bərpa etməsindən sonra sülh sazişinin imzalanması üçün real şansların olduğunu bildirən nazir Ermənistanın bu tarixi imkanları müsbət dəyərləndiriləcəyinə ümidvarlığını ifadə edib.