Ceyhun Bayramov "Türkiyə və Suriyadakı insanlar üçün birlikdə" tədbirində iştirak edib

Xarici işlər naziri Ceyhun Bayramov Belçikanın paytaxtı Brüsseldə keçirilən “Türkiyə və Suriyadakı insanlar üçün birlikdə” Beynəlxalq Donorlar Konfransında iştirak edib.

Konfrans Türkiyə və Suriyada baş verən təbii fəlakətin fəsadlarının aradan qaldırılmasına dəstək göstərilməsi məqsədilə təşkil olunub.

Konfransda çıxış edən nazir Ceyhun Bayramov Azərbaycanın baş vermiş dağıdıcı zəlzələlər nəticəsində böyük insan tələfatı, o cümlədən dağıntılarla üzləşən qardaş Türkiyə, habelə Suriya ilə həmrəyliyini ifadə edib.

Zəlzələnin ilk günlərindən etibarən Azərbaycanın Türkiyəyə dəstəyini nümayiş etdirirək dərhal axtarış və xilasetmə dəstələri, tibbi heyət, könüllülər, habelə humanitar yardımlar göndərdiyi diqqətə çatdırılıb. Azərbaycanın bölgəyə 940 nəfər xilasedici, tibbi personal və könüllü dəstələri, 5 300 tondan artıq humanitar yük göndərdiyi, indiyə qədər Türkiyənin zəlzələ bölgəsində çalışan aidiyyəti təşkilatlar vasitəsilə 45 mln. ABŞ dollarından artıq maddi yardım göstərdiyi vurğulanıb.

Azərbaycanın bundan sonra da qardaş Türkiyənin yanında olacağı, ölkəmizin zəlzələdən sonrakı bərpa və quruculuq işlərində maddi və texniki dəstəyin göstərilməsini davam etdirəcəyi diqqətə çatdırılıb. Azərbaycanın bölgədə bərpa-quruculuq işinə töhfə çərçivəsində 100 mln. ABŞ dolları məbləğində yaşayış binalarının, sosial obyektlərin və təhsil ocağının tikintisini həyata keçirəcəyi elan olunub.