Fazil Mustafadan İlham Əliyevə təbrik mesajı
Fazil Mustafa Prezident İlham Əliyevi təbrik edib. Böyük Quruluş Partiyası Prezident seçkilərinin ilkin nəticələri ilə bağlı bəyanat yayıb.
Bəyanatda deyilir ki, 2024-cü il fevralın 7-də keçirilən prezident seçkilərində Böyük Quruluş Partiyası partiyanın sədri Fazil Mustafanın namizədliyi ilə təmsil olunub.
“Fazil Mustafanın təbliğat-təşviqat prosesi aktiv şəkildə qurulub və maneəsiz şəkildə ölkənin müxtəlif regionlarında seçicilərlə görüşləri keçirilib. Fazil Mustafanın aktiv təbliğat işinə dövlət qurumları tərəfindən hansısa maneə yaradılmayıb və təzyiqlər göstərilməyib.
Partiyanın seçki qərargahının üzvləri müşahidəçilərin rəyinə əsasən belə hesab edir ki, bu prezident seçkiləri demokratik rəqabət mühitində keçirilib və seçki prosesində hər hansı ciddi qanun pozuntuları qeydə alınmayıb.
Biz Böyük Quruluş Partiyasının sədri prezidentliyə namizəd Fazil Mustafanın Seçki Qərargahı olaraq bu prezident seçkilərinin ilkin nəticələrini tanıyır, səsvermənin ilkin nəticəsini qanuni hesab edir və Azərbaycan xalqının böyük etimadını qazanaraq prezident seçilən İlham Əliyevi qələbə münasibətilə təbrik edirik. İnanırıq ki, xalqımızın doğru seçim etdiyi öz müsbət nəticələrini qısa zamanda göstərəcək”, – deyə bəyanatda bildirilir.