Formula 1-in Bakıda keçirilməsinin önəmi | Belə tədbirlər ölkəyə nə vəd edir?

Dünyanın ən populyar avtoidman növlərindən biri olan “Formula 1” yarışının ölkəmizdə keçirilməsi mühüm hadisədir.

Avtomobillərin şəhərin ən qədim hissəsi olan və UNESCO-nun Ümumdünya İrsi Siyahısına daxil edilən “İçərişəhər” Tarixi-Memarlıq Qoruğunun ətrafında dövr etmələri paytaxtın iqtisadi, siyasi, humanitar, idman, hərbi tədbirlərin mərkəzi rolunda çıxış etməsi və müsbət imic formalaşdırmasına xidmət edir.

Siyasi şərhçi Sahil Kərimlinin sözlərinə görə, bu kimi yarışların paytaxtda baş tutması Azərbaycan həqiqətlərinin dünya ictimaiyyətinə dolğun və düzgün istiqamətdə çatdırılmasında da mühüm əhəmiyyət daşıyır:

“Eyni zamanda ölkəmizin qonaqpərvərliyi, bu tədbirlərin keçirilməsi ilə bağlı peşəkarlığı dünyaya nümunə kimi çatdırılır”.

Millət vəkili Vüqar Bayramov isə qeyd edib ki, belə yarışların ölkədə təşkili yeni sərmayələrin cəlb edilməsi, eyni zamanda xidmət və turizm sektorunda dövriyyənin artmasına xidmət edir:

“Əldə edilən anlaşmalar növbəti dövrdə ölkəyə – qeyri-neft sektoruna daha çox sərmayənin cəlb edilməsinə imkan yaradacaq”. Artıq bütün dünyanın gözü Bakıdadır. “Formula 1” kimi böyük izləyici kütləsinə malik yarışın paytaxtımızda keçirilməsi Azərbaycanın idmana verdiyi diqqətin və bu missiyanın ölkəmizdə hər zaman özünü doğrultduğunun təsdiqidir.