Fransanın müstəmləkəsi Qvadelupe Azərbaycandan kömək istədi

Fransa bizi beynəlxalq aləmdən təcrid etməyə çalışır. Biz Azərbaycanın qlobal gücünə güvənərək ondan kömək istəyirik.

Bunu "Qvadelupe Milli Alyansı" təşkilatının beynəlxalq əməkdaşlıq üzrə xüsusi nümayəndəsi Patrik Tasita deyib.

Bildirib ki, Qvadelupenin əhalisi dörd əsrdir Fransanın əsarəti altında yaşayır və ölkədə müstəqillik tərəfdarı olanlar Fransa tərəfindən təzyiqlərə məruz qalır:

"Qvadelupedə vəziyyət çox ağırdır. Çünki çoxları buranın Fransa ərazisi olduğunu düşünür. Amma bizim torpağımız Fransa rejimindən, onun müstəmləkəçiliyindən əziyyət çəkir. Biz heç nə istehsal etmirik, istehsal olunan bir şey olsa belə, həmin məhsullar bizi müstəmləkə altında saxlayan ölkəyə, yəni Fransaya gedir.

Ölkəmizdə inkişaf yoxdur. Beynəlxalq ictimaiyyətdən gözləntimiz var, biz öz problemimizi, mübarizəmizi dünyaya çatdırmaq istəyirik. Müstəmləkə altında olan əraziləri nəzərə almasaq, Fransa kiçik bir ölkədir və dünya bunu bilməlidir. Biz Azərbaycanın qlobal gücünə güvənərək bu ölkədən kömək istəyirik. Dünya Azərbaycanı tanıyır və məhz Azərbaycanın dəstəyi ilə bütün dünyanın bizim problemimizdən xəbərdar olmasını istəyirik".

Təşkilat nümayəndəsi həmçinin bildirib ki, artıq tam suveren ölkə olmaq üçün xalq bütün imkanlardan istifadə etməyə çalışır və buna tam hazırdır.