Gürcüstanda erməni radikal qrupundan təxribat: gürcülərdən soydaşımıza dəstək

Gürcüstanda fəaliyyət göstərən Gürcüstanın erməni icması adlı radikal qruplaşma ölkənin ictimai kanalının etnik azərbaycanlı əməkdaşına qarşı sosial mediada qarayaxma kampaniyası başladaraq onun vəzifəsindən azad edilməsi tələbi ilə aksiya keçirib.

Radikal qrupun üzvləri Gürcüstan İctimai Televiziyasının binası qarşısına toplanaraq kanalın departament rəhbəri Ramilə Əliyevaya qarşı müxtəlif əsassız ittihamlar irəli sürüblər.

Məsələ ilə əlaqədar Baku TV-yə açıqlama verən Ramilə Əliyeva erməni qruplaşmasının ona qarşı bu addımının səbəbinin Gürcüstan mediasında Qarabağla bağlı yayımlanan xəbərlərin məhz ermənilərin maraqlarına cavab verməməsi olduğunu deyib.

Erməni radikallarının əsas məqsədinin Gürcüstanda yaşayan azərbaycanlılarla burada yaşayan ermənilər arasında qarşıdurma yaratmaq olduğunu deyən soydaşımız heç bir halda buna yol verməyəcəyini dilə gətirib.

Xaricdən idarə olunduğu açıq-aşkar bəlli olan radikal qruplaşmanın fəaliyyəti barədə müsahibə verən gürcü politoloqlar da erməni separatçılarının bu addımının Gürcüstan daxilində ciddi problemlər yaratmağa hesablandığını bildiriblər.