Həlak olan pilotların dispetçerlə "danışığı" yayımlandı | Rusiya mətbuatından yeni iddialar

Qazaxıstanın Aktau şəhərində qəzaya uğrayan “Azərbaycan Hava Yolları”na məxsus “Embraer 190” təyyarəsi ilə bağlı Rusiya mətbuatı yeni iddialarla çıxış edib.

Təyyarənin guya pilotları ilə aviadispetçerlər arasındakı söhbətin stenoqramını yayan Rusiya KİV faciənin əsl səbəbini gizlətməkdə maraqlı olduqlarını nümayiş etdirir.

Belə ki, əvvəlcə “Baza” “Telegram” kanalının, daha sonra isə ölkə mətbuatının iddiasına görə, təyyarə heyəti Mahaçqalada eniş etmək istəsə də, imtina aldıqdan sonra guya müstəqil şəkildə Bakıya geri qayıtmaq qərarına gəlib. Rusiya dispetçerləri isə guya ona Rusiya ərazisinə eniş üçün bir neçə variant təklif ediblər. Stenoqramda deyilir ki, ekipaj əvvəlcə Qroznıya enməyə hazır olsa da, sonra bundan imtina edərək “Bakıya gedirik” deyib.

Bildirilib ki, danışıq zamanı pilot “quş sürüsü ilə toqquşma” və pilot kabinəsinin zədələnməsi barədə hava nəqliyyatı dispetçerlərinə məlumat verib. İddiaya görə, pilot saat 8:11-də “Azərbaycan 82-43, Bakıya doğru gedir”, – deyə nəzarətçiyə bildirib. Saat 8:16-da pilot təyyarəyə xarici təsir barədə məlumat verib.

“Qroznı, imtina verdi. Quş sürüsü zərbəsi oldu. İki oturacaq partladı”, – deyə qeyd olunub. Saat 8:18-də pilot təyyarəyə nəzarəti itirib, daha sonra isə salonda təzyiqin artdığını bildirib. Məlumatda o da qeyd olunub ki, saat 8:22-də təyyarənin idarəetməsi və hidravlikası sıradan çıxıb. Daha sonra sərnişin salonundakı oksigen tükənib və insanlar huşunu itirməyə başlayıb. On dəqiqədən sonra təyyarə Aktauda təcili eniş tələb edib.

Belə görünür ki, Rusiya “Telegram” kanalları təyyarənin vurulmasını göstərən bütün dəlillərə rəğmən, baş verən hadisənin motivini başqa məcraya yönəltməyə çalışır.