Həyat yoldaşım qucağında 1 yaşlı körpə ilə qar çovğununa düşdü | QƏRBİ AZƏRBAYCAN XRONİKASI

“Qərbi Azərbaycan Xronikası” layihəsi çərçivəsində “Həyat Hekayəsi” verilişinin növbəti buraxılışı efirə gedib.

“Xəstəxanada işləyirdim, ermənilər məcburən ərizəmi aldılar ki, işdən azadsan” adlı veriliş Qərbi Azərbaycanın Göyçə mahalının Basarkeçər rayonunun Böyük Qaraqoyunlu kənd sakini Elçin Alməmmədovun həyat hekayəsinə həsr olunub.

O, uşaqlıq və məktəb illərini xatırladıb, dağların ətəyində yerləşən kəndləri ilə bağlı maraqlı xatirələrindən söz açıb:

“Uşaqlıq illərim çox gözəl keçib. Sinif yoldaşlarım, öz tay-tuşlarımla dağlarımızda gəzmişik. Kəndimiz çox səfalı yerdə yerləşib. Bizim kəndin tarixi yerləri çox olub, iki qəbiristanlıq, alban kilsəsi var idi”.

E.Alməmmədov kənddə müəllimlərin yaxşı təhsil verdiyini söyləyib:

“A və B sinfində 60-a yaxın şagirdin 98 faizi ali və orta təhsilə yiyələnirdi. Orta məktəbi qurtarandan sonra bizi o vaxt İrəvan şəhərində institutda, kollecdə oxumağa qəbul etmirdilər. 1983-cü ildə Gəncə şəhərində Tibb Texnikumunu qurtarandan sonra Qaraqoyunlu kəndinə qayıtdım və orada Zod kəndində Psixi Xəstəxanada işlədim. Mənimlə bərabər başqa yoldaşlar da işləyirdi.

1988-ci ildə xəstəxanada işlədiyimiz gün ermənilər tərəfindən bizim ərizəmiz alındı ki, siz işdən azadsınız. Dedilər ki, sizə burada yer yoxdur, sizin yeriniz Azərbaycandadır. Bizi öz dədə-baba yurdumuzdan didərgin saldılar. Əliyalın, pis vəziyyətdə 1988-ci ilin dekabr ayında Kəlbəcərə köç etdik”.