İƏT daimi nümayəndələr şurasının iclası keçirilib

Azərbaycanın İqtisadi Əməkdaşlıq Təşkilatında sədrliyi çərçivəsində Daimi Nümayəndələr Şurasının 273-cü iclası keçirilib.

Tədbir ölkəmizin İrandakı səfiri Əli Əlizadənin sədrliyi, İƏT-in Baş katibi Xusrov Nozirinin və təşkilata üzv dövlətlərin Tehrandakı diplomatik nümayəndəliklərinin rəhbərlərinin iştirakı ilə hibrid formatda baş tutub.

Müzakirələr zamanı Azərbaycan nümayəndə heyəti yanvarın 27-də Azərbaycanın İrandakı Səfirliyinə qarşı törədilən terror hücumu ilə bağlı məlumat verib. Terror aktını təşkil edənlərin və törədənlərin tezliklə müəyyənləşdirilərək məsuliyyətə cəlb edilməsi, eləcə də İran tərəfindən “Diplomatik əlaqələr haqqında” Vyana Konvensiyasından irəli gələn öhdəliklərin yerinə yetirilməsinin, diplomatik nümayəndəliklərin mühafizəsi və təhlükəsizliyinin təmin edilməsinin zəruriliyi üzv dövlətlərin nümayəndələrinin diqqətinə çatdırılıb.

İclasın sonunda Daimi Nümayəndələr Şurasının növbəti iclasının razılaşdırılmış tarixi barədə iştirakçılara məlumat verilib.