İlham Əliyev yeni holdinqlə bağlı fərman imzaladı | Detallar açıqlandı

Prezident İlham Əliyev “Azərbaycan Nəqliyyat və Kommunikasiya Holdinqi”nin (AZCON) yaradılması və bununla əlaqədar bəzi məsələlərin həll edilməsi haqqında Fərman imzalayıb.

Fərmana əsasən, Holdinqin idarəetməsinə veriləcək dövlət müəssisələrinin, habelə dövlət payı olan təsərrüfat cəmiyyətlərinin və publik hüquqi şəxslərin siyahısı təsdiq edilib.

Bunlar “Azərbaycan Hava Yolları”, “Azərbaycan Dəmir Yolları”, “Azərbaycan Xəzər Dəniz Gəmiçiliyi”, “Bakı Metropoliteni”, “Bakı Beynəlxalq Dəniz Ticarət Limanı” QSC-lər, “BakuBus” və “Bakı Gəmiqayırma Zavodu” MMC-lər, Rəqəmsal İnkişaf və Nəqliyyat Nazirliyi yanında Kosmik Agentlik (Azərkosmos), Nazirliyə məxsus “Aztelekom”, “Azerbaijan International Telecom” (AzInTelecom), “Azərpoçt”, “Bakı Taksi Xidməti” MMC-lər, “Radio-Televiziya Yayımı və Peyk Kommunikasiyası” İstehsalat Birliyi, eləcə də ilk səkkiz hüquqi şəxsin təsisçisi və iştirakçısı olduğu hüquqi şəxslər və müəssisələrdir.

AZCON-un fəaliyyətinə ümumi rəhbərliyi Müşahidə Şurası, cari rəhbərliyi icraçı direktor həyata keçirir.

Qurumun Müşahidə Şurasının sədri rəqəmsal inkişaf və nəqliyyat naziri, üzvləri isə iqtisadiyyat nazirinin müavini, maliyyə nazirinin müavini, rəqəmsal inkişaf və nəqliyyat nazirinin müavini, eləcə də Rəqəmsal İnkişaf və Nəqliyyat Nazirliyi yanında Dövlət Mülki Aviasiya Agentliyinin direktoru, Dövlət Dəniz və Liman Agentliyi İdarə Heyətinin sədri və Kosmik Agentliyin İdarə Heyətinin sədridir.

Holdinqin nizamnamə fondu 10 milyon manatdır və idarəetməsinə verilmiş dövlət müəssisələri tərəfindən ödənilən vəsait hesabına formalaşır. Rəqəmsal İnkişaf və Nəqliyyat Nazirliyi AZCON-un Nizamnaməsinin layihəsini hazırlayıb, bir ay müddətində Prezidentə təqdim etməli, Fərmandan irəli gələn digər məsələlərin həlli üçün zəruri tədbirlər görməlidir.