İlham Əliyev Zəfər parkında | Prezident xatirə daşının önünə gül dəstəsi qoydu

Sentyabrın 27-də – Anım Günündə Prezident İlham Əliyev Bakıda inşası davam etdirilən Zəfər parkında olub.

Dövlət başçısı parkın girişində xatirə daşının önünə gül dəstəsi qoyub.

Qeyd edək ki, şanlı zəfərimiz və ölkəmizin ərazi bütövlüyünün təmin olunması ilə sona çatan Vətən müharibəsinin başlamasından dörd il ötür. Xalqımız Vətən uğrunda canından keçən şəhidlərin ruhunu ehtiramla yad edir. Bakıda inşası davam etdirilən Zəfər parkı həm də bu ehtiramın təcəssümüdür.

İlham Əliyevin 2020-ci il dekabrın 3-də imzaladığı sərəncamla inşası davam etdirilən layihəyə əsasən, torpaqlarımızın azad olunması uğrunda tarixi Qələbəyə gedən yolu, Vətən müharibəsində qəhrəmancasına döyüşmüş əsgər və zabitlərimizin, bütün şəhidlərimizin xatirəsini yaşatmaq məqsədilə kompleksin ərazisində muzeyin yaradılması nəzərdə tutulur.

Muzey kompleksində Vətən müharibəsi şəhidlərinin hər birinin adı həkk olunacaq, burada toplanacaq eksponatlar ərazilərimizin işğaldan azad olunması uğrunda mübarizə aparan əsgər və zabitlərimizin igidliyini, xalqımızın əzmini bir daha nümayiş etdirəcək. Kompleks park ilə əhatə olunacaq.