İqtisadi inkişafa söykənən siyasi güc - Azərbaycanın strategiyası | GLOBAL PANORAMA

Baku TV-nin “Global Panorama” verilişinin yeni buraxılışı yayımlanıb.

Verilişin budəfəki sayında rəqabətə davamlı, iqtisadiyyatın qazandırdığı siyasi-diplomatik üstünlüklərdən bəhs olunub.

Bildirilib ki, müasir dünyada hər bir ölkənin dayanıqlı inkişafı, sözünün eşidilməsi onun iqtisadiyyatının rəqabət qabiliyyətli olmasından və şaxələndirilməsindən çox asılıdır.

Azərbaycan da bu konsepsiyaya önəm verir:

“Azərbaycan Avropa və Asiyanın kəsişməsində yerləşməsi ilə xarakterizə olunan əlverişli, coğrafi mövqeyindən, eləcə də neft-qaz kimi təbii resurslarından istifadə etməyə, rəqabətə davamlı iqtisadiyyat qurmağa və onu şaxələndirməyə çalışır. Bu baxımdan ölkəmizin regional və qlobal ticarət yollarında əsas oyunçuya çevrilməsi, qeyri-neft-qaz sektorunu inkişaf etdirməsi xüsusi vurğulanmalıdır”.

Qeyd edilib ki, Azərbaycanın siyasi-diplomatik münasibətlərində iqtisadi rəqabət qabiliyyəti həlledici rol oynayır:

“Ölkəmiz iqtisadiyyatını gücləndirdikcə, beynəlxalq aləmdə sövdələşmə imkanlarını artırır”.

Vurğulanıb ki, ölkəmizin COP29-a ev sahibliyi etməsi onu iqlimlə bağlı qlobal müzakirələrdə lider kimi mövqeləndirir:

“Azərbaycanın rəqabət qabiliyyətli iqtisadiyyat qurmağa diqqət yetirməsi təkcə onun iqtisadi inkişafı üçün deyil, həm də diplomatik əlaqələrin möhkəmləndirilməsi üçün vacibdir.

İqtisadi şaxələndirmə, yüksək məhsuldarlıq və strateji tərəfdaşlıq bu səylərin əsas komponentləridir. Azərbaycan rəqabətə davamlı iqtisadiyyatla diplomatik təsirini təmin edərək həm regional, həm də qlobal arenalarda mühüm oyunçuya çevrilir. İqtisadi artım və diplomatiya arasındakı bu sinerji Azərbaycanın gələcəyini formalaşdırır”.