İrəvan seçim etməlidir | Hulusi Kılıçdan sülh müqaviləsi barədə mesaj

“Azərbaycanla Ermənistan arasında sülh mətni üzərində əldə edilən razılaşma Türkiyə tərəfindən də sevinclə qarşılandı.

Bununla belə Azərbaycanın xarici işlər naziri Ceyhun Bayramov sülh prosesinin irəliyə aparılması üçün Ermənistanın daha iki şərti yerinə yetirməli olduğunu açıqladı. Bu, Ermənistan konstitusiyasında Azərbaycana ərazi iddialarını ehtiva edən müddəalarla bağlıdır. Digəri isə ATƏT-in Minsk qrupundan imtina məsələsidir”.

Bu sözləri Teleqraf-a Türkiyənin Azərbaycandakı keçmiş səfiri, İMZA Sosial İnkişafa Dəstək İctimai Birliyinin Türkiyə nümayəndəsi Hulusi Kılıç deyib.

Diplomat qalıcı sülh üçün bir-birinə qarşı ərazi iddialarına birdəfəlik son qoyulmalı olduğunu söyləyib:

“Bu hüquqi sənədlərdə də əksini tapmalıdır. Azərbaycanın bu tələbləri beynəlxalq hüquqa əsaslanır. Eyni zamanda İrəvan Minsk qrupu ilə bağlı mövqeyini ifadə etməlidir. Həmsədrlik institutu 44 günlük Vətən müharibəsi ilə tarixin arxivinə göndərilib. Artıq onun fəaliyyətinə ehtiyac qalmayıb”.

O bildirib ki, Ermənistan sülh mesajları fonunda Azərbaycanla şərti sərhəddə hərbi təxribatlardan əl çəkmir:

“Bu, ziddiyyətli davranışdır. Fransa və başqa ölkələrdən Ermənistana göndərilən silahlar, görünür, onları bir qədər həvəsləndirib. Bütün bunlar erməni tərəfinin sülh prosesinə səmimi yanaşmadığını nümayiş etdirir.

Türkiyə Azərbaycanla Ermənistan arasındakı sülh prosesini yaxından izləyir. Bakı ilə İrəvan arasında yekun sülh sazişi imzalandıqdan sonra Türkiyə ilə Ermənistan arasında əlaqələrin normallaşması mümkündür. Bundan da faydalanan Ermənistan olacaq”, − o əlavə edib.