Markov Rusiyadakı azərbaycanlılardan danışdı | Aranı qatmaq istəyənlər...

“Rusiya ilə Azərbaycan dost dövlətlər, qardaş xalqlardır. Bəzi insanların vəziyyətdən sui-istifadə etmək niyyətləri gerçəkləşməyəcək”.

Bunu rusiyalı politoloq Sergey Markov Rusiya-Azərbaycan münasibətlərini şərh edərkən deyib.

O əlavə edib ki, Federasiyada əslən azərbaycanlı olub Rusiya vətəndaşlığı alaraq ölkə iqtisadiyyatına töhfə verən kifayət qədər insan var.

“İllər öncə işləmək üçün Rusiyaya gəlib sonradan vətəndaşlıq alan çox sayda insan var. Onların və Azərbaycandan gələn digər miqrantların təqib edilməsi yolverilməzdir, doğru deyil. Təəssüflər olsun ki, Rusiyada yetərincə türkofob qüvvələr var, onlar insanları repressiyaya məruz qoyurlar. Bu adamlar AZAL-a məxsus sərnişin təyyarəsinin Qroznı üzərində Rusiya Hava Hücumundan Müdafiə sistemindən açılan atəş nəticəsində qəzaya uğraması hadisəsindən istifadə edərək Rusiya ilə Azərbaycan arasında münasibətləri gərginləşdirmək istəyirlər.

Əmin edirəm ki, Rusiya cəmiyyəti azərbaycanlılara qarşı bu cür nifrətin əleyhinədir. Rusiya rəhbərliyi dəfələrlə təsdiqləyib ki, o, heç vaxt milli mənsubiyyətinə görə insanların təqibinə yol verməyəcək. Rusiya və Azərbaycan dost dövlətlər, qardaş xalqlardır.

Əminəm ki, bir müddət sonra ölkələr arasında yaşanan gərginlik aradan qaldırılacaq. Sərnişin təyyarəsinin qəzaya uğraması nəticəsində ortaya çıxan problemlər öz həllini tapacaq. Rusiyada ölkələr arasında münaqişə yaratmaq istəyən, dostluq münasibətlərinə xələl gətirən insanlara qarşı ciddi tədbirlər görüləcək, bu, yolverilməzdir. Onların vəziyyətdən istifadə etmək niyyətləri gerçəkləşməyəcək”, – deyə politoloq əlavə edib.

Sergey Markov vurğulayıb ki, hazırda yaşananlara baxmayaraq, Rusiya ilə Azərbaycan dostluğu daha da irəliləyəcək.