MDB-nin Sərhəd Qoşunlarının Komandanları Şurasının iclası keçirilib

Bakıda Müstəqil Dövlətlər Birliyinin Sərhəd Qoşunlarının Komandanları Şurasının 86-cı iclası keçirilib.

Tədbirdə Azərbaycanla yanaşı, Rusiya, Belarus, Qazaxıstan, Qırğız Respublikası, Özbəkistan, Tacikistan, Türkmənistan və Ermənistanın sərhəd xidmətləri, MDB-nin İcraiyyə Komitəsi, həmçinin Antiterror Mərkəzi və Birliyinin digər institutlarının nümayəndələri iştirak ediblər.

Tədbirdə iştirak edən Dövlət Sərhəd Xidmətinin rəisi Elçin Quliyev Sərhəd təhlükəsizliyinin təmin edilməsi məsələlərinin Prezident İlham Əliyevin xüsusi diqqətində olduğunu bildirib. Həmçinin qeyd edib ki, ərazi bütövlüyümüz bərpa edildikdən sonra dövlət sərhədinin azad edilən hissələrində xidməti-döyüş fəaliyyətinin təşkili üçün zəruri tədbirlər həyata keçirilib.

General-polkovnik onu da vurğulayıb ki, son illərdə sərhəd təhlükəsizliyi ilə bağlı təhdidlərin müəyyən transformasiyası, transsərhəd cinayətinin yeni növ və formaları müşahidə edilir. Bu baxımdan gedən proseslərin vaxtında və düzgün qiymətləndirilməsi, sərhəd təhlükəsizliyinin təmin edilməsinə kompleks və səmərəli yanaşma beynəlxalq terrorizm, separatizm, transsərhəd cinayətlər, o cümlədən qeyri-qanuni miqrasiya, narkotik vasitələrin və digər qadağan olunan materialların qaçaqmalçılığı ilə mübarizədə təsirli vasitədir.

İclasda həmçinin Prezidentin köməkçisi, Prezident Administrasiyasının Hərbi məsələlər şöbəsinin müdiri Məhərrəm Əliyev də çıxış edib. O, dövlət sərhədlərimizin mühafizəsində yeni üsulların tətbiqi istiqamətində işlər aparıldığını deyib.

O cümlədən Azərbaycanın Cənubi Qafqazda dayanıqlı sülhün təmin edilməsinə tərəfdar olduğunu vurğulayıb. Bildirib ki, bu baxımdan, sərhədlərin qorunması və təhlükəsizliyinin təmin edilməsi, həmçinin bu məsələdə güclərin səfərbər edilməsi vacib əhəmiyyət kəsb edir.