Müqavilədə nələr qeyd olunub? - Ermənistan XİN-dən vacib məlumat

İrəvan Ermənistanla Azərbaycan arasında sülh sazişi üzərində işi bir ay ərzində başa çatdırmağa və onu imzalamağa hazırdır.

Bu barədə Ermənistan Xarici İşlər Nazirliyi məlumat yayıb.

“İki ölkə arasında müqavilənin imzalanmasının vaxtı yetişib. Ermənistan tərəfi onun yaxın bir ay ərzində başa çatdırılması və imzalanması istiqamətində konstruktiv və intensiv işləməyə hazır olduğunu ifadə edir”, – deyə məlumatda qeyd edilib.

Vurğulanıb ki, Ermənistanla Azərbaycan arasında müzakirə olunan müqavilədə tərəflərin ərazi bütövlüyünü tanıdığı və bir-birinə qarşı heç bir ərazi iddiası olmadığı açıq şəkildə qeyd olunub.

Sənədə görə, tərəflərdən heç biri sülh sazişindən irəli gələn öhdəlikləri yerinə yetirməmək üçün daxili qanunlarına müraciət edə bilməz.

“Müqavilənin imzalanması və onun daxili prosedurlar vasitəsilə ratifikasiyası bu prinsipləri möhkəmləndirəcək. Müvafiq olaraq hesab edirik ki, tərəflərin bütün narahatlıqlarının aradan qaldırılmasının ən aydın və birbaşa yolu Ermənistan və Azərbaycan arasında uzunmüddətli sülh səhifəsini açacaq sazişin imzalanmasıdır”, – deyə bəyanatda qeyd edilib.