Müstəqilliyin Bərpası Günündə tarixi qələbə - QARABAĞ XRONİKASI

“Qarabağ xronikası”nın budəfəki buraxılışında Xudafərin körpülərinin azad edilməsinin hərbi-strateji və tarixi əhəmiyyətindən bəhs olunub.

Bildirilib ki, 2020-ci ilin oktyabrında Cəbrayılın azad edilməsi Azərbaycan Ordusunun Araz boyunca qərbə doğru irəliləməsi üçün yeni imkanlar açıb. Düşmənin müdafiə xəttini yarmaq məqsədilə Hərbi Dəniz Qüvvələrinin xüsusi təyinatlıları – “Dəniz pişikləri” Əmirvarlı və Soltanlı kəndləri istiqamətində əməliyyatlar həyata keçirib, Dövlət Sərhəd Xidmətinin Çevik Hərəkət Qüvvələri isə Dəlidağ və ətraf yüksəklikləri nəzarətə götürüb.

Diqqətə çatdırılıb ki, mürəkkəb relyefə və güclü müqavimətə baxmayaraq, Azərbaycan bölmələrinin koordinasiyalı fəaliyyəti düşmənin müdafiə sisteminin mühüm mövqelərinin sıradan çıxarılmasına, Xudafərinə gedən yolun açılmasına və Zəngilan istiqamətində hücumun inkişafına şərait yaradıb.

Vurğulanıb ki, 2020-ci il oktyabrın 18-də, Azərbaycanın dövlət müstəqilliyinin bərpası haqqında Konstitusiya Aktının qəbul edilməsindən düz 29 il sonra Xudafərin körpüsündə Azərbaycan bayrağı qaldırılıb. Tarixi hadisə işğaldan azad edilən torpaqlarda dövlət suverenliyinin bərpasının rəmzinə çevrilib.